حبي الأول

 كل وحدة لين الحين تتذكر أول شخص كلمته في حياتها .. حتى لو كلمت عقبه مليون واحد بتم تتذكر أول شخص (إذا ما تتذكرين بصراحة عليج العوض)

عموماً، انا كنت وايد صغيرة يوم كلمت (س) من بوظبي و تصدقون إني لين الحين أذكر رقمه و وين ساكن حتى أذكر المكان اللي رقمني فية و  كل اللي إستوى جنه البارحة، آخر شي أعرفه عنه إنه تزوج وياب بنت إسمها حصة الله يستر عليه ويوفقة لأنة بصراحة كان وايد زين وياية ومول مازعلني أو غثني

طبعا يوم عرفتة كنت بعدني فالمدرسة و طلعت وياه كذا مرة بس في مرة أبدا ما أنساها، كان رادني البيت و أمي كانت تترياني عند الباب، حزتها تمنيت الأرض تنشق وتبلعني، صراحة ماذكر شو إستوى عقب تصدقون

في ناس يمرون على قلوبنا ويتركون بصمه حلوة و (س) واحد من هالناس اللي دايما بذكرهم بالخير

لكن للأسف يا (س) ماعدت الحب الأول .. ولا العاشر .. ولا ال

طافوا علي عقبك ناس علموني هالدنيا صح

شو تبون بالضبط؟

دوم نقرا إيميلات ونسمع نكت إنه البنات بشكل عام عالم مخيف وغامض ومستحيل حد يفهمهم أو يفهم شو يبون. أنا وياكم و بالفعل نحن البنات أحياناً نكون متلخبطات أو مش واثقين من شي أو غيره لعدة أسباب، لكن صدقوني إذا البنات مستحيل الواحد يفهمهم، فالشباب مستحيلين أي بنت تقدر تعرف هم شو يبون بالضبط.

ماتصدقون!!!!! خلوني أخبركم

الوحدة إذا عرفت واحد وبغت إنها تكون الوحيدة في حياتة إحتمال كبير تنجلط وتموت لأنة الشباب من سابع المستحيلات ترضيهم أو تترس عيونهم. على سبيل المثال: إذا البنت محترمة وماسكة نفسها يقولون عنها معقدة وباردة وماتحس. وإذا البنت متفتحة وتعبر عن نفسها بكل حرية يقولون طفسة ولعابة وراعية شباب. وإذا البنت تتعدل و تتكشخ قالو خقاقة وتبا تغازل. وإذا البنت محتشمة ولافه شعرها قالوا مطوعة أو جلحة ملحة أو أحيانا ياما تحت السواهي دواهي. إذا إنتي من النوع الهادي قالوا مملة، وإذا تكلمت وفرفشت فالوا حشرة. إذا انتي من عايلة قو قالوا هاي أكيد لها طلعات وسيرات وردات لاوتصرف عالشباب بعد، وإذا إنتي من عايلة على قد حالج قالوا هاي حشكلية. شو نسوي نموت مثلاً

شو تبون البنت تسوي عشان ترضيكم يا معشر الشباب

أنا بعد عدة تجارب طويلة ومريرة إكتشفت إنة الشاب من المخلوقات اللي لو تفج راسه بسكروب مابتعرف هو في شو يفكر! لذلك ما يترس عينة إلا الترااااااااااااااااااااااااااااااااب

فقررت أكون على طبيعتي وما أتصنع وأتقمص شخصيات مالها أول ولا أخر عشان أرضي الطرف الآخر، لأني مهما سويت فماشي فايدة

محاولة إرضاء الشباب هي نفسها بالذات محاولة النفخ في بالونة مخبوقة

بداية النهاية

مرحبا

بصراحة ماعرف كيف ولامن وين أبدا .. أنا بنت مثل كل البنات وصدقوني يمكن في بعض الأحيان أحسن منهن

عشت حياتي بالطول والعرض، لكن عمري مافكرت إني أتجاوز حدودي أو إني أسوي شي يغضب ربي (هيه أنا إنسانة فالنهاية مسلمة، أصوم وأصلي) أبداً ماحب التعميم الغجري اللي يؤمن فيه كثير من الناس واللي ينص إنة أي بنت كلمت شاب أو طلعت معاة لازم نشطب عليها بالقلم الأحمر لاونحط تحتها خط بعد. تخلف اللة لابليتنا

يمكن تتسائلون أنا لبش قررت أسوي هالمذكرة وليش الحين بالذات. أنا ياجماعة الخير (وأعوذباللة من كلمة أنا) تعبت وأنا أدور حب حياتي والشخص اللي أتمنى من كل قلبي أقضي عمري معاه، تدرون ليش؟ لأنه مافي في هالزمن بالذات حد يستاهل إني أحبه أو أضحي علشانة. أنا حاولت صدقوني، لكن مع ذلك فشلت. فشلت إني أحصل إنسان صادق في هالزمن الصعب، هالزمن الخادع. وفشلت إني أحاول أفهم شبابنا وأعرف هم شو يبون بالضبط مع إني في داخل داخل دااااااااخل أعماقي مازال عندي بصيص من الأمل يقولي إني في يوم من الأيام بلقى الرجل الصح في الوقت الصح والمكان الصح بس لازم أصبر. أتمنى بس ما أكون غلطانة.

عموما أنا مش غير عنكن يا بنات. يمكن أكون أختكن، صديقتكن، وحده تعرفنها.

لكن فالنهاية كلنا عشنا نفس التجارب، بس أنا الوحيدة اللي بتكتب عنها وبكل ص ر ا ح ة

عموماً هذي المذكرة مجرد مكان أطلع فيه كل اللي في خاطريه

إلى لقاء قريب إن شاء اللة